Heilna du Plooy  (1947) is gebore in Pretoria en het grootgeword op Bronkhorstspruit en Alberton waar haar ouers vanaf haar tiende jaar gewoon het. Haar ouers was albei onderwysers en sy is die middelste van drie dogters. Sy het studeer aan die PU vir CHO (BA en onderwysdiploma 1965-1968) en het later haar honneurs (1977) en MA (1982 onder leiding van prof. Elize Botha) behaal aan UP. Haar proefskrif het sy geskryf onder leiding van prof. T.T. Cloete in Algemene Literatuurwetenskap zan die voormalige PU vir CHO. Dit is gepubliseer (Butterworth, 1986) as Verhaalteorie in die twintigste eeu.

Na haar studies in Potchefstroom het sy vir een jaar skoolgehou en is daarna getroud met Andries du Plooy. Hulle het vir 6 jaar in Durban gewoon waar Dries predikant was van die Gereformeerde Kerk Durban. Daarna was hulle in Pretoria in die gemeente Alkantrant vir 11 jaar. Hulle het vier kinders, ’n dogter en drie seuns en nou ook 5 kleinkinders.

Na voltooiing van haar studie aan UP was Heilna vir twee jaar deeltyds verbonde aan die Departement Afrikaans aan UP en daarna vir amper 4 jaar ’n dosent aan UNISA. Dries word in 1986 professor in Kerkreg aan die Teologiese Skool en die PU vir CHO en die gesin trek Potchefstroom toe.  Daarna het Heilna vir 5 jaar klasgegee in Algemene Literatuurwetenskap aan die PU vir CHO en word tpe aangestel in die Departement Afrikaans en Nederlands (vanaf 1992 tot 2012). Sy is tans professor en senior navorser in die Navorsingseenheid Tale en Literatuur in die Skool vir Tale aan die NWU.

Sy is die skrywer van  ongeveer  60 navorsingsartikels en talle hoofstukke in boeke oor Afrikaanse en Nederlandse prosa en poësie en teoretiese onderwerpe,

Sy het ’n aantal kortverhale gepubliseer asook vertalings van gedigte.  In 2013 het ’n vertaling van werk van Willem van Toorn verskyn met die titel Paaie vir die deurtog (Litera).  Daar het drie digbundels uit haar pen verskyn, Die donker is nooit leeg nie (Tafelberg, 1997) en In die landskap ingelyf (Protea, 2003) en Die stilte opgeskort (Protea, 2014). In 2016 verskyn haar eerste roman, Die taal van been (Litera). Tans werk sy aan ’n brieweboek van geselekteerde briewe uit die nalatenskap van van Elize Botha. Sy was ook betrokke as literêre adviseur by die Cloete-omdigting van die Psalms en is tans literêre adviseur by die nuwe direkte vertaling van die Bybel in Afrikaans.

Vir afleiding teken en skilder sy (waterverf en oliverf), luister graag musiek en maak tuin.